متفقين ان الايام اللى عايشين فيها مختلفة تماماً عن الايام و الزمن اللى امهاتنا كانوا عايشين فيه .. 
بالتالى طريقة كل عروسة فى اختيار اساسيات جهازها لازم برضو تبقى مختلفة و متماشية مع العصر الحالى
من حيث العدد و الاساسيات نفسها, تبعاً للحالة المادية و الذوقية كمان.

تعالى بقى نعد مع بعض الاساطير اللى اتربنا عليها فى جهاز العروسة : 

الاسطورة الاولى : 
لازم نغزى العين و نجيب اغلى حاجة لزوم المنظرة frown

خلينا نتفق على مبداء مهم انك داخلة اصلا حياة مش حرب بالتالى اى عين هتغزيها !!
عين باقى عائلتك و لا عائلته هو !! و ليه لازم اغلى حاجة هو انتى هتبيعها بعد كدة !! و لا علشان تعيش اكتر !!
حاليا للاسف اغلب المنتجات و المفروشات جودتها قلت حتى الاجهزة غير زمان برضو 
يعنى قبل ما تشترى اعرفى من المقربين ليكى اللى لسه مخلصين جهازهم اشتروا منين
او بملاحظتك انتى لو مش حابة تسألى افهمى بالطريقة كدة و الحداقة wink

بس عموماً اغلب الحاجات بتتجاب يا اونلاين يا من معرض صنع فى سورية يا من حمام التلات 
عندك اونلاين مثلا Turkish tex ( منتجات تركى و سوري ) 

* بالتالى هاتى اللى يعجبك و من تجارب اللى حواليكى شكروا في استخدامه  

الاسطورة التانية : 
هاتى ملايات مشجرة و سادة و فوط عادية و قطيفة !! 

خلينا برضو نتفق ان السرير الوقتى ستايل تركى عبارة عن 4 خداديات
و دة غير التقليدي اللى هو 2 كيس مخدة و 2 كيس خددية !!
فانتى ليه تشترى اطقم سرير مشجرة و سادة نظام قديم !!
اشترى اللى يتماشى مع ستايل غرفة النوم كلها و ركزى على اللى يريح عينك انتى
حتى لو كله سادة او كله مشجر لو دهانات الغرفة هادية 

الفوط بقى بناء على الاستخدام هتلاقى القطيفة بتشرب مياه ااقل يعنى لو بتنشفى بيها هتنشف اقل يبقى اية لزمتها !!
هاتى فوط قطنية و العدد اللى يناسب مادياتك انتى مالكيش دعوة ابداً بالعدد اللى بيتقال و لازم !! اية اللى لزمه !! angry

 
الاسطور التالتة :
العدد فى الليمون !! 
 
و دى بقى اكبر جريمة اتعملت فى حياة البنت المصرية !! 
لازم 3 اطقم حلل ( سيراميك و تيفال و صاج او ستانلس )ليه !! هو طقم واحد كفاية و الله 
و لازم 24 ملاية سرير و 24 فوطة و لازم و لازم و الله ما لازم اصلا !!
انتى فى بداية حياتك محتاجة الارقام المهولة دى فى اية دة انتو يدوب فردين
و بعد شوية هيبقى فى نونو هتعملى اية بالاعداد دى كلها !! 
و بعدين تشتكى من جهاز العروسة انه غالى !!
طيب مدام الاسعار عموماً فى الطالع ما تجيبى اللى هتستخدميه بس 

 
الاسطور الرابعة : 
لازم النيش علشان الناس ما تكلش وشنا !!
 
و ضيفى عليهم غرفة الاطفال و دول اخطر الاساطير و الله
 احنا راضين ذمتك يا شيخة اية لازمة طقمين صينى كل طقم بكام الف
و تحطى واحد منهم انتيكة و واحد للضيوف و طقم تانى للعشاء !! بالله عليكى دة منطق اصلا !!
ممكن جدا تكتفى بالسفرة و بوفيه صغنن يلم الاساسيات تبقى قريبة من ايدك و انتى بتجهزى السفرة 
و ليه اوضة الاطفال اللى اساسا كلنا عارفين انه اى نونو بيفضل نايم فى غرفة باباه و ماماته لحتى يدخل المدرسة تقريباً ..
ليه تجيبيها من الاول !!
لما يبقى فى اطفال هاتى سرير صغنن لحتى يقدر ينام لوحده جهزى له اوضته على ذوقه و فننى فيها براحتك .

عارفة احنا بنقولك كل دة ليه ؟ علشان ما يحصلش معاكى زى العروسة دى !! 
بصى الحمام لما يبقى كدة surprise



و لا المطبخ لما يبقى كدة surprise


 
كل social media اتكلمت عنها حتى خالد عليش فى معاك فى السكة  
لان ما فيش ابدا كدة فى الدنيا !! اية لزمة 4 و لا 5 ازايز شاور و 3 و لا 4 علب شامبو 
و اعداد مهولة من الحاجات اللى هى اصلا موجودة فى market تقدرى تشتريها فى اى وقت !!
 
الخلاصة :
جمعنا لك الاساطير الاربعة اللى بيضحكوا بيها على كل عروسة بتحضر بيتها و الاجيال بتتوارث نفس الاساطير 
بس لانك مختلفة مش هتمشى ورا الاساطير دى  
لانك ببساطة معاكى اجمد check list فيها الاساسيات اللى ممكن تبقى تايهة فى دماغك 
ادخلى على : قائمة جهاز العروسة 
علمى على اللى جبتيه و اعرفى اية اللى ناقصك و العدد متروك ليكى حسب ماديتك 
و لو هنتكلم عن العام فمن تلقاء نفسك هاتى نص اى عدد يتقالك و هكذا 

و نقول الف مبروك و ما تنسيش تعملى Save للـ Check list , و تخليها ع موبايلك 
علشان ترجعى لها بسهولة فى اى وقت .

شوفى كمان

تابعى اجدد العروض المضافة لينا اول بأول

كل خدمات الافراح

ضيف شغلك معانا